میان استمانی لبزانک ءِ تران  شاہ ابن شین

 

لبزانک ءِ دیمروی ءِ ھاترا یکشلیں ءُ بودناکیں کار مانا دار ایت پرچا کہ لبزانک ھرچیز ءَ را چہ آئی ءِ رواج گپتگیں دروشم ءَ بدل کنگ ءِ ءُ مانا دار کنگ ءِ نام اِنت لبزانک چہ راجمانی، ربیدگی، راجکاری ءُ رِپکی (تکنیکی) بدلی آں سان زور ایت ءُ دیمروی کنت

ما باز براں جیڑیں کہ لبزانکی دیمروی ءِ تہ ءَ تھنا لبزانک ءِ جتا جتائیں جُنزانی کرد بودناک تر اِنت ھو اے گپّ ءَ راستی یے ھست بلے ھمے جُنزانی ودی بوھگ ءِ پُژدر ءَ یک موسمے ءِ یک گواتے ءِ یک بدلی یے ءِ سُر ءُ پرے لازم بیت تو اگاں scientific یا سائنسی رنگ ءَ چیزاں بچارئے گڑا دنیا ءِ دیم ءَ شتگ ایں یا دیمروی کتگیں لبزانکانی سرا ادبی جُنزاں ھوار راجمانی، ربیدگی، وانگ ءُ زانگی گلّانی ، شنگکاری ادارگ ءُ میان استمانی اسرانی مزنیں دستے مان بوتگ.

مسال چاگردی بدلی کہ آئی ءِ تہ ءَ سنتی آشوب بہ بیت، راجمانی جُنز بہ بنت یا شھرکاری بہ بیت اے لبزانک ءَ نوکیں بُن گپ دینت ھمے وڑ ءَ شنگکاری ءِ نوکیں رِپک انچو کہ انوں چاگردی رسانک در اِنت ھمے میڈیم ءَ شر کار گِرگ لبزانکی تاک جوڑ کنگ نوکیں نبشتہ کاران ءَ موہ دیگ وتی نزیکیں مُلکے ءِ ربیدگے ءَ گوں باوست کنگ چرآھاں چیزے زورگ ءُ آھاں وتی زانشی سان ءِ بکشگ یا راجکاری بُن گپانی سرا نوک جیڑگ آشوبی جنزانی ھاترا سوڑگ اے درسیں کار لبزانکی دیمروی ءِ مانزمان اَنت بلے شرت ایش اِنت کہ یکشل ءَ بہ بنت ءُ بودناکیں رنگے ءَ بہ بنت

ماں بلوچی لبزانک ءَ لبزانکی جنزانی سرا کپّی چُنڈی نبشتانک نویسگ بوتگ بلے اے نیمگ ءَ دلجمیں کار دیم ءَ نہ یتکگ کہ کسے Modernism یا Postmodernism ءِ سرا یک تاکبندے ءِ شکل ءَ کارے بُنگیج بہ کنت Existentialism یا Feminist Literature ءِ سرا کسے سرجمیں کتابے بہ نویس ایت
یا بلوچستان ءِ انوگیں جاوراں بچار ایت ءُ Postcolonial Literature ءِ کتابے رجانک بہ کنت یا دیوانے ھمے سرھال ءَ بہ ٹھین ایت چنوا اچیبے ، سلویا پلات، ایم جے ھیرج ءِ کارانی یا لیکہ آنی بابت ءَ بگش ایت یا
Digital Literature
ءِ سرا کسے ماں چاگردی رسانک در ءَ تاکے بُنگیج بہ کنت
یا کسے چاگردی لبزانک بزاں Eco-Literature ءِ نیمگ ءَ ھم دلگوش بہ دنت

اے درائیں جنزانی نیمگ ءَ دلگوش گور کنائینگ ءِ مول اش انت ما وت ءَ کمو بچاریں کہ ما کجا اوشتاتگیں ! لبزانک لبزانک کنگ ءَ دیمروی نہ بیت اگاں چوش بوتیں گڑا انوں 2025 ءَ ھم بلوچی لبزانک تھنا دو ڈسٹرکٹ ءَ محدود نہ بوتگ ات

(چہ ایشاں ابید نوکیں راجکاری، ربیدگی یا لبزانکی جُنزاں آشنا بوھگ ءُ وتی مھلوک ءَ سرپد کنگ ھم پہ لبزانک ءَ یک شھمیں زانشی بدلی آورت کنت)

شاہ ابن شین