فکری کارکن بیگاہاں سمبہینت نہ کنت :  گوٛہرام اسلم بلوچ

نوشتانک

فکری کارکن بیگاہاں سمبہینت نہ کنت :  گوٛہرام اسلم بلوچ

گند اے عہد ءِ زوراکیاں وہد چوں تیزگامی ءَ بدل بوہان اِنت ۔ آ یک انچیں دؤرے اَت کہ بلوچستان ءَ ہر سیاسی کارکنے ءَ پہ وتی بزگین ءُ لگتمالیں راج ءَ ہمینچو کہ گیش جہد کت ہمینچو آئی ءِ جہد ساڑائگ بُوت ءُ جہد ءِ پڑ ءَ رہشونانی رد ءَ ہمگام بوت ءُ دیما جنزان بوت ۔ چو کس ءَ نہ چار اِت کہ” پلانی“ چنچو نیزگارءُ بزگ اِنت ، آ چنچو مالدار انت، بگندئے ایوک ءَ چارگ ہمے بوت کہ آ وتی نزوریں بالاد ءَ ءُ نیزگاری ءَ گوں وتی راج ءِ جہد ءَ چنچو دل پہک اِنت۔ گوں ہمے نیزگاری ءَ چنچو پند بُرّ اِت کنت ءُ داں کد اے زوراکانی دیما اوشتیت ءُ بلوچ جہد ءَ دیما بُرت کنت (اش اَت مئے عہد ءِ فکری سیاست ءِ میرٹ) بلئے نوں بیا بچار کہ مئے فکری سیاست کجا اتکگ ءُ کئے ءَ سر بوتگ ، چے لوٹ اِت اَنت مئے زیکیں فکری سیاست ءِ ءُ چے بوئگ ءَ اِنت مرچی۔۔۔

ہما سیاسی کارکن کہ زی بلوچ ءِ پہربندگی سیاسی گل BSO تلّو ءِ سرا فکری تربیت در بُرت ءُ راجی سیاست اِش بنا کت دیم پہ راج ءِ رہشونی ءَ ، ہمے امیت ءُ نیت ءَ کہ آئی ءِ مرچیگیں جہد باندا بلوچ راج ءَ چرے عزاب ءُ جنجال ءَ کشیت ءُ مئے سروکاں وتی عہد ءِ ہما روایتی ءُ بلوچ کاز ءِ حلاپءَ سرکار ءِ دیما آؤرتگیں ”وت گڑیں “ معتبر مزاجیں کاروباری ”سرکاری ایجنٹ“ آنی حلاپ ءَ سکین دات اَنت، ہما ورنا وتی عہد ءِ سیاسی طاقت زانگ بوتگ اِت اَنت کہ اشاں پہ وتی سروکانی گوٛشگ ءِ پدا پہ بلوچ ءِ ہاترا ہرچ وڑیں قربانی دیگ ءَ چک ءُ پد نہ بوت اَنت ، ہرچیز کہ رہشوناں گوٛشت ، آئیءِ سرا عمل کنگ ہر سیاسی کارکن ءَ وتی راجی ذمہ واری سرپد بوت۔ نعرہ ایوکا ہمش اِت اَنت کہ اے سیاست ءِ واجہ اد ءِ نیزگار ءُ درتگ پُچ ءِ چک اِنت، اے فکری سیاست ءَ ایوکا چہ جہد ءِ کُراہ ءَ دراتکگیں نظریاتی نودربر دیما بُرت کنت۔ بگندئے ہمے فکری سیاست راج ءَ چہ حاکمانی گلامی ءَ آجو کنت ۔

اے انچیں نعرہ اِت اَنت کہ مئے رنگیں نودربراں ہم چرے نعرہاں وتا جتا کت نہ کت۔ زمین ءِ گپ اَت، راج ءِ گلامی ءُ بزگی ءَ آجو کنگ ءِ گپ اَت ، وت واجہی ءِ گپ اَت، پدا سروکانی وشتریں گپ اش اِت اَنت کہ اے سیاست ءِ باندات شما اِت ۔ شُما آؤکیں پدریچ ءِ رہشون ات، پہ باندات ءَ درچِنگ بوتگ ات، ما گل ءَ بال اتیں وت ءَ راج ءِ باندات ءِ رہشون گندگ ءَ اتیں، بلئے دیر نہ گوٛست کہ سروک چہ وتی قولاں بجّ ات انت وتی ہر گشتانک داتگیں فکر اِش پشت ءَ دور دیان بوت انت، چیروکائی درٛستاں گوش گپت انت ءُ توبہ کت، چہ لیکہ ءُ قولاں دست کشان بوت انت ءُ اے عہد ءِ کت کہ بیا ماشما درست یکجاہ بیئِں شپُکاں چہ اے ساپ ءُ پلگاریں فکری سیاستءَ کشیں ءُ دور دئیں، اے سیاست ءِ واجہ شما ات، اے سیاست شمے جہدانی برورد انت. مئے وڑیں ملنگ تبیں سیاسی کارکناں وتی لانک مان جت ءُ چادر بڈّ ءَ کت دراتکیں دیم پہ ( فدا شہید چار راہ ءَ) فدا احمد، بلوچ سیاست ءِ فخرانت، ہر بلوچ آئی نظریہ سرا پہر بندیت ءُ گوٛشیت کہ آ فدا ءِ جہد ءِ وارث انت). ہرکس کہ چار راہ ءَ کیتیں دلیل ایوک ءَ ہمیشں انت کہ مارا مئے پاکیں سیاست چہ شپُکاں پاک کنگی انت ایشی ءِ ہاترا شمارا نوجواناں یکجاہ بوئگی انت، لہتیں مردماں مئے نوک بنا کتگیں نعرہ ءِ سرا ٹہک دات ءُ کند ات، ءُ لہتین ءَ گوٛشت ہو یار! نو چیزے کنگی انت شرّ انت کہ شما ہمت کُتگ دیر نہ گوٛست کہ سروکاں اے نعرہ ءَ بدل کنگ ءِ بابت ءَ جیڑ اِت۔ چیا کہ راج ءِ شپانک شپُک ءِ محتاج بوہان بوت، پرچہ کہ شپُک ءَ مزنیں مال ءُ مڈّی ئے کٹّیتگ، آ ہر وڑےکہ لوٹیت گوں وتی مال ءُ مڈیاں رہشون ءَ را وتی راہ ءَ بُرت کنت۔ فکری سیاست پولنگ بوہان بوت، کارکن وتی نظریہ سرا اوشتاتگ ات، بلے سروک چہ وتی قولاں بج اِت انت، بے حال ات انت کہ آہاں گوں راج ءَ چے عہد کُتگ ات!۔ اے گپ ءِ تہا ہچ شک نیست۔ اے ملک ءِ اسٹیبلشمنٹ ءِ نگاہاں بلوچ قوم پرست گل ہچبر بیسہ نہ کنت۔ آ روچ ہم دور نہ اِنت کہ ما ہمے نام نہادیں شپُک کہ سرکار ءَ ترٛاشتگ انت، سک باز بژن ءِ ہبر انت کہ من ءُ تو روچے دہ رند آیاں پتر دیاں کہ بیا ات ما شما ہوار بئیں ، سرکار یک روچے ہمیشاں تئی رہشون کنت ءُ ہمے کہ مئے مرچی رہشونی ءَ کنگان انت، ہمیشانی پدریچ باندا ہمے شپُکانی رند گیری ءَ لاچار بنت، انگتہ وہد انت کہ مئے رہشون وتی فکری سیاسی شرفداری ءَ بہ رکین انت، اگاں آ لوٹاں کہ آ راج دپتر ءَ وشنام بہ بںت، گڈا وہد انت کہ یک برے پدا وتی پالیسی سرا نگاہ ئے بہ جن انت۔ اگاں نا گڈا باندا کہ راج ہرچ جنجالےءَ کپیت راج دپتر مئے رہشوناں ہچبر نہ بکشیت۔

بلے مئے سیاسی سروک اے ہبرءَ ہچبر بے حال مہ بنت کہ اے سیاسی ’’لیگیسی“ ءِ دیما بروک بس نظریاتی ءُ فکری نوجوان بوت کن انتءُ آدگر موسمی دُرٛستیں ہمراہ ترا نیم راہ ءَ دُرٛوہ انت۔ تئی سیاست ءِ دیما بروک تئی BSO ءِ جہدءَ دراتکگیں جُرت مندیں سیاسی ورنا انت۔ آ روچ دُور نہ انت کہ ہمے موسمی آں کہ ماشما رودینگ ءَ ئیں ءُ وتی فکری سیاسی کارکن ءَ دیوار ءَ جنگ ءَ ئیں ہمے درٛست تئی سیاستءِ حلاپ ءَ یکجاہ بنت ءُ سرکار ءِ کُٹ ءَ نند اںت ءُ من ءُ تو ننداں حیراں باں،( انچُش کی انّو بوہگان انت، وتی رودینتگیں وتی جند ءِ گُٹ ءَ لوپ انت) انگتہ وہد انت کہ ما وتی نظریاتی کارکناں پجہ بیاریں ، اشاں بہ پہریزیں، اے مئے زیکیں فکری سیاست ات، بیا کہ مرچی سیاست ءِ تب ءُ میل یکدم بدل بوتگ، ہر کس کہ بیگاہ ءَ سمبہینت کنت، آ مرچیگیں عہد ءَ سیاست ءِ پڑا وتارا دیما بُرت کنت، اگاں ناں گُڈا ، انگتہ وہد باز انت وتی راہ ءَ جُدا بہ کنت سیاستءِ پڑ ءَ دگہ جاگہ باز انت، نوں ہما سیاسی کارکن ہمے جیڑیت کہ من یک فکری سیاستے ءِ منّوگرے آں، من گوں یک فکری سیاستے ءَ بندوک باں گڈا آ نو وتی گیگ ءَ بہ چاریت، اگاں آ رہبرانی یا ٹولیانی بیگاہاں براہ دار کُت کنت وَ پرائی ءَ جاگہ ہست اگاں نا گڈا “چرپ ءُ چانگالیں موسی وت گڑیں نوجوان سینئر سیاسی رہنما” کہ مال ءُ مڈی اش باریں چہ کجا کٹّیتگ اِش ، رہبرانی بیگاہاں وڑ وڑا سمبہینت کن اںت، آیانی دیما اے عہد ءِ فکری سیاسی کارکناں ہچ بستار نیست۔ اے کاراں ہما سیاسی کارکن کُت نہ کنت کہ آئی ءِ مکہیں ماتاں کہ “ گُد دوچی” کُتگ ءُ وتی لاڑُکیں بچ پہ نازے رودینتگ انت اے سیاست ءِ پڈ دست بڈا جتگ، نو ہما مکہیں مات ءُ چُک ہردو بژنیگ انت۔ سیاسی کارکن ءِ کار فکری سیاست ءَ را دیما برگ انت نیکہ بیگاہ سمبہینگ انت، اگاں اے ہمے پشت کپتگیں سیاست دیما برگی انت گڈا زلورت اش انت کہ بیا عہد کنیں کہ سیاسی کارکناں چرے عزاب ءَ رکینیں۔

 

بشکریہ آساپ