کریم دَشْتی اوں یات کنگ بہ بیت

کریم دَشْتی اوں یات کنگ بہ بیت

(کریم دَشْتی1939 – 30 جولائی 1984)

1939ءَ دَشْت کنچتی ءَ پیداک بوتگیں بلوچی زبان ءِ مزن شانیں شاعر، نگدکار، رجانکارءُ کسمانکار کریم دَشتی بلوچی لبزانک ءَ ھور انگریزی، اردو، فارسی لبزانک ءِ چِست ءُ ایراں ہم آژناگ بوتگ۔ نگدکاری بزاں تنقید ءِ پڑءَ دَشْتی ءِ کتابے "شرگداری”ءِ نام ءَ چھاپ بوتگ۔ دَشْتی شرگداری ءِ وانگ ءَ چہ مردم ہمے مار اِیت کہ بلوچی لبزانک ءَ واجہ کریم دَشْتی ءِ اسل پِڑ ہمے نگدکاری اِنت۔ نگدکاری ءَ دومی ءِ ساچشتانی شری ءُ ھرابی پہ ھاترءُ دوستی چارگ نہ بنت بلکیں پہ بے تماہ ءُ رُوءُ رِہا ءَ دیمءَ آرگ بنت۔ عطا شاد گْوش اِیت کہ "شرگدارءِ اولی مستریں سپت آئی ءِ نترسی اِنت۔ آ کہ ہچ کسے ءِ بیم ءُ ترس ءَ کمار نہ کنت وتی زِرد ءِ گوانک ءَ اشکنت پہ مہرءُ دوستی شرگدارءِ بد ءُ رَد پہ دوستی اِنت شرگدار ءِ گلا ءُ ستا پہ دوستی اِنت شرگدار وت وانندہ ءُ علم زانتے پمشکا آ پہ ہچ گونگ ءَ دِگر ءِ ریپ ءُ پَرّامگ ءَ ایر جنگ نہ بیت۔ ما وتی دَور ءِ شرگداری ءَ بچاراں دَشْتی ءِ اے کتاب چو نترسی ءِ آشوبے ءَ دیم ءَ کیت۔ "کریم دَشْتی ءِ شاعری ءَ پَگر ءُ تھمیات دَری نہ اَنت آ کجام رنگ ءَ کہ ساچشتکاری کنت آئی ءَ را بلوچی دْروشم ءَ دَرشان اِیت۔ کریم دَشْتی ءِ شاعری ءِ بابت ءَ ممتاز یوسف گْوش اِیت کہ:
"کریم دَشْتی ءِ بابت ءَ بازینے ءِ گُشگ اِنت کہ آ غزل ءِ شاعرے ، منی ھیال ءَ کریم بلوچی ءِ ھما شاعر اِنت کہ آئی ءَ غزل ءِ واگان ءَ بلوچی ءَ تَرّ اینتگ ءُ آئی ءَ را گوں زھیر، موتک ءُ نازینکاں ھمدپ کتگ۔ غزل ءِ چشیں دْروشم مئے شاعری ءَ چِد ءُ پیش گِندگ نہ بیت۔”
دستونک
ھال وشیں پہ من ءَ تئی کُل دَپ ءِ اے دمک ءُ پَل
تاں جھاں ھست اِنت او دابانی پری ٹھلے بِہ مَل

ما کدی گْوشت ءَ کہ مارا ایوک ءَ زِیر ءُ بِہ نِند
ھر کسی میر ءُ نواب ءِ ھر کس ءَ دَستے بِہ جَل

آسرے دار اِیت نِزوریں ھستی ءِ اھد ءُ رَگام
ھست ءَ پہ نیستی بَھیناں نیستی ھچبر مَہ ھَلّ

ھَو تئی راست اَنت صدق ءَ تو بِکن ھرچی کن ئے
تو ھما میر ءِ شنک ءِ گوں کَے ءَ بَے جَلّ ءُ پَلّ

کپت ءَ ڈُکّالے کریمؔ ڈیھ ءَ کہ ھِچّی سر نیاتک
تو وتی عشق ءِ علاج ءَ چے کن ئے رنجاں کہ وَلّ