احتساب کا عمل تیز، بلوچستان میں بڑی گرفتاریوں کی تیاری

کوئٹہ: محکمہ سروسز اینڈ جنرل ایڈمنسٹریشن (ایس اینڈ جی اے ڈی) کی جانب سے جاری اعلامیے کے مطابق اینٹی کرپشن اسٹیبلشمنٹ کو بلوچستان انکوائریز اینڈ اینٹی کرپشن (فنکشن، پاورز اینڈ پروسیجر) رولز 2011 کے سیکشن 11 کے تحت مجاز اتھارٹی کی منظوری سے آگاہ کر دیا گیا ہے۔ اعلامیے میں کہا گیا ہے کہ جلال کاکڑ، سابق ڈائریکٹر جنرل محکمہ خوراک، اور محمد رحیم، ڈائریکٹر مانیٹرنگ محکمہ خوراک، کو گرفتار کرنے کی باقاعدہ اجازت دے دی گئی ہے۔

ذرائع کے مطابق مذکورہ افسران کے خلاف محکمہ خوراک میں مالی بے ضابطگیوں اور اختیارات کے ناجائز استعمال سے متعلق انکوائری جاری تھی، جس کے نتیجے میں یہ پیش رفت سامنے آئی۔ اینٹی کرپشن حکام کا کہنا ہے کہ گرفتاری کے بعد مزید تفتیش کی جائے گی اور شواہد کی روشنی میں قانونی کارروائی کو آگے بڑھایا جائے گا۔

دوسری جانب حکومتی ترجمان نے اس اقدام کو احتساب کے عمل کا حصہ قرار دیتے ہوئے کہا ہے کہ بدعنوانی میں ملوث عناصر کے خلاف بلاامتیاز کارروائی جاری رہے گی۔ انہوں نے واضح کیا کہ شفافیت اور میرٹ کو یقینی بنانے کے لیے حکومت پرعزم ہے۔

تاحال ملزمان کی جانب سے اس معاملے پر کوئی ردعمل سامنے نہیں آیا ہے، جبکہ اینٹی کرپشن حکام جلد ہی مزید پیش رفت سے آگاہ کریں گے۔