ڈاکٹر منظور بلوچ۔۔۔۔۔۔۔۔ھم شرمندہ ہیں تحریر: ڈاکٹرطاہرحکیم بلوچ

ڈاکٹر منظور بلوچ۔۔۔۔۔۔۔۔ھم شرمندہ ہیں

تحریر: ڈاکٹرطاہرحکیم بلوچ

آخری قسط

جبکہ واقعہ سے متعلق یونیورسٹی آف تربت نے اپنے ایک وضاحتی بیان میں اپنا نقطہ نظر دیتے ہوئے کہا ہے کہ پروفیسر منظور بلوچ ان کیلئے انتہائی قابل احترام شخصیت ہیں،لیکن اسے جس پروگرام کے لئے جس طلبہ تنظیم نے مدعوکیا تھا اس کی پیشگی اطلاع نہ اس طلبہ تنظیم نے یونیورسٹی انتظامیہ کو دی ہے اور نہ منظوربلوچ نے اپنے آنے کی اطلاع یونیورسٹی انتظامیہ کو فراہم کی ہے۔لیکن جونہی وائس چانسلر کو منظور بلوچ کے آنے کی اطلاع ملی تو انہوں نے اسے خوش آمدید کرنے کیلئے نہ صرف رجسٹرار کو اس کے پاس بھیجا بلکہ لیکچر پروگرام کے انتظامات کے لئے احکامات بھی جاری کردئیے جبکہ رجسٹرارنے نہ صرف وائس چانسلر کے احکامات کی روشنی میں نہ صرف ملٹی پرپز ہال میں لیکچر کے لئے انتظامات کرلئے بلکہ انہیں ویلکم کرنے کے لئے خود گیٹ تک بھی گئے۔لیکن معاملے نے اس وقت گھمبیر شکل اختیار کی جب یونیورسٹی آف تربت نے اپنی پالیسی کے تحت غیرمتعلقہ طلبہ اور آؤٹ سائیڈرز کو یونیورسٹی کے اندر آنے کی اجازت نہیں دی۔کیونکہ ان میں سے زیادہ تر طالب علموں کا تعلق مکران میڈیکل کالج سے تھا جنہوں نے چند عرصہ پہلے ہنگامہ آرائی کرتے ہوئے یونیورسٹی کے مین گیٹ کو تالا لگایا تھا۔کہ جس کی پاداش میں یونیورسٹی نے اپنے کیمپس کے اندر ان کے داخلے پر پابندی عائد کی تھی۔
ترجمان نے یونیورسٹی انتظامیہ پر لگائے گئے تمام الزامات کومسترد کرتے ہوئے مزید کہا کہ یونیورسٹی آف تربت مکران میں اعلیٰ تعلیم کا سب سے بڑا ادارہ ہے،بطور ادارہ ہر قسم کی علمی،ادبی اور ثقافتی سرگرمیوں کی حوصلہ افزائی کرتی رہے گی۔جس کی واضع مثال گزشتہ دو مہینوں کے دوران مبارک قاضی کی یاد میں دو ادبی پروگراموں کی ہے جو انسٹی ٹیوٹ آف بلوچی لینگویج اینڈ کلچر اور انگلش ڈیپارٹمنٹ کی جانب سے منعقد کئے گئے ہیں۔جامعہ تربت کیلئے پروفیسر منظور بلوچ سمیت تمام پروفیسرز،اساتذہ کرام،دانشور،ادیب اور شاعر قابل احترام ہیں۔یونیورسٹی ان کے علمی،تعلیمی،ادبی تحقیقی خدمات کو قدر کی نگاہ سے دیکھتی ہے۔اور ان کے علم اور تجربے سے ہمہ وقت استفادہ حاصل کرنے کی کوشش میں ہے۔
یونیورسٹی آف تربت جو بلوچستان کی دوسری بڑی جنرل یونیورسٹی ہے جس نے بلوچستان کے انتہائی پسماندہ علاقہ مکران ڈویژن کے صدر مقام تربت میں اپنے سفرکا آغاز بطور سب کیمپس بلوچستان یونیورسٹی 2009میں کیا تھا۔جسے 2012 میں ایک مکمل یونیورسٹی کا درجہ دیا گیا۔جس نے انتہائی قلیل عرصہ یعنی چودہ سالوں کے اندر مکران کی سماجی،معاشی اور تعلیمی ترقی میں انتہائی اہم اور بنیادی کردار ادا کیا ہے۔جامعہ سے فارغ ہونے والے طلبا وطالبات نے نہ صرف بلوچستان پبلک سروس کمیشن بلکہ وفاقی پبلک سروس کمیشن اور دوسرے اداروں میں نمایاں کامیابیاں حاصل کی ہیں اور اپنے ادارے کا نام روشن کردیا ہے۔اچھی شہرت اور مثالی کارکردگی کی وجہ سے ہر جگہ مثالیں دی جاتی تھیں ۔اس کے اساتذہ اور انتظامی آفیسران سوسائٹی میں قابل قدر نگاہوں سے دیکھے جاتے تھے لیکن گزشتہ چند عرصے سے اس یونیورسٹی کو کسی کی نظر بد لگ گئی ہے۔اس کی تعلیمی،تحقیقی ترقی کا سفر آگے بڑھنے کی بجائے ترقی معکوس کی جانب جاری ہے۔آئے روز کے واقعات نے اس کی نیک نامی،ساکھ اور شہرت کو کافی گزند پہنچا یا ہے۔اب یہ ہرروز میڈیا اور سوشل میڈیا کی زینت بنی ہوئی ہے۔
ان وجوہات کی بنا پر نہ صرف سوسائٹی میں بلکہ یونیورسٹی کے اپنے ملازمین اور اساتذہ میں ایک بے چینی اور تشویش پائی جاتی ہے جوکہ بلا سبب نہیں ہے کیونکہ انہیں خارجی اور داخلی دونوں طرح کے مسائل کا سامنا ہے جن میں اساتذہ اور ملازمین کو بروقت تنخواہوں کی ادائیگی ایک اہم مسئلہ کی شکل میں سامنے آرہا ہے جبکہ دوسری طرف ان کی تنخواہوں سے (80٪)اسی فیصد ہارڈ شپ کو منجمد کردیا گیا ہے۔ملازمین کیلئے جو میڈیکل پالیسی بنائی گئی ہے اس میں نہ ان کے بوڑھے والدین کو شامل کیا گیا ہے اور نہ اوپی ڈی اور ٹیسٹ کو۔ملازمین کے پروموشن پر سوالات اٹھ رہے ہیں۔چند ملازمین عدالت تک پہنچ چکے ہیں۔جبکہ دوسری جانب کوئٹہ میں بیٹھی ہوئی بیوروکریسی ویسے ہی بلوچستان کے جامعات کے پیچھے پڑی ہوئی ہے وہ جامعات کو مالی اور انتظامی طور پر کمزور کرنا چا ہتے ہیں اور پروفیسروں کو اپنا مطیع بنانے کا خواہاں ہیں جبکہ اس طرح کے ناخوشگوار واقعات اور پالیسیوں سے انہیں جامعات ،ان کے اساتذہ اور ملازمین پر معاشی وار کرنے کا ایک اور بھرپور موقع ملے گا۔
چونکہ یونیورسٹی آف تربت ایک قومی ادارہ ہے اسے بچانے ،اس کی ساکھ کو بحال کرنے اور اسے ترقی کی جانب گامزن کرنے کی ذمہ داری کسی ایک پر نہیں بلکہ تمام اسٹیک ہولڈرز پر عائد ہوتی ہے۔اس کے نام پرپروپیگنڈہ کرنے کی بجائے اس کی تعمیر و ترقی میں کردار ادا کرنا ہوگا۔اس وقت یونیورسٹی مالی اور انتظامی حوالے سے جن مسائل کا شکار ہے ان کا ٹھوس حل ڈھونڈنا ہوگا۔اور اس کے ساتھ ساتھ یونیورسٹی منیجمنٹ اور انتظامیہ کو بھی اپنی چند پالیسیوں پر نظرثانی کرنا ہوگی۔اپنے اللّے تللّے بند کرنے ہونگے۔گزشتہ چند عرصے سے مین گیٹ کو جس طرح ایک تماشا بنایا گیا ہے اس کے لئے ایک مربوط مکینزم اور طریقہ کار وضع کرنا ہوگا۔یونیورسٹی میں غیرنصابی سرگرمیوں،اسٹڈی سرکلز،بک ریویو،علمی مکالمے ،سیمینار،بک اسٹالز،ایڈمیشن سیل قائم کرنے پر بندش کا کوئی جواز نہیں۔انہیں کسی بھی صورت جسٹی فائی نہیں کیا جاسکتا۔کیونکہ جامعات تو تحقیق،تخلیق،تنقیدی فکر،علمی مکالمے اور نئے افکار وخیالات کو جنم دینے کے بنیادی مراکز ہوتے ہیں۔علم اور تخلیق کے سرچشمے یہیں سے پھوٹتے ہیں۔جبکہ سیاست،سماجی سائنس،اور انسانی علم کا نام ہے ۔سوال یہ ہے کہ اگر سماجی تبدیلی کے فکر اور علم سے جامعات کو نقصان پہنچتا ہےتو پھر کیوں جامعات نے سیاسیات کے شعبے اور سوشل سائنسز کے فیکلٹیز قائم کئے ہیں۔؟
یونورسٹی آف تربت کی اس وقت سب سے بڑی فیکلٹی سوشل سائنسز اور زبان و ادب کی ہے جبکہ آئی آر اور ہسٹری کے نئے شعبے بھی کھولنے کی تیاری کی جارہی ہے،اس سے یونیورسٹی اپنی ہی پالیسیوں کی نفی کررہی ہے۔یہ سماجی علوم ہیں جو ذہنی و فکری تبدیلیوں کے باعث بنتی ہیں جب تک ذہنی و فکری تبدیلی نہیں آتی تب تک سائنس،کمپیوٹر سائنس اور ٹیکنالوجی کی کوئی وقعت نہیں ہے۔کیونکہ اسے استعمال کرنے کے لئے ایک ذہن وفکر کی بھی ضرورت پڑتی ہے۔یورپ نے پہلے سماجی علوم کی آبیاری کی۔تنقیدی فکر اور فلسفیانہ افکارو خیالات کوجنم دیا جس کی واضع مثال نشاۃ ثانیہ Renaissanceکی ہےجس نے پورے یورپ میں ایک ذہنی و فکری انقلاب برپا کرکےبعد میں سائنس اور ٹیکنالوجی کیلئے میدان ہموارکردیا۔یہ ایک سماجی ارتقائی عمل ہے،فطری اور سماجی ارتقائی عمل کو کسی فردی خواہشات کے تابع نہیں کیا جاسکتا۔
یونیورسٹی آف تربت سمیت بلوچستان میں جتنے بھی تعلیمی ادارے قائم ہیں یہ سب سیاست اور سماجی تبدیلی کے عمل اور فکر کی مرہون منت ہیں۔یہ کسی سائنسدان کے کارنامے نہیں ہیں بلکہ یہ سیاست دانوں کے ہی بنائے ہوئے یادگاریں ہیں۔بلوچستان کی پہلی یونیورسٹی ،پہلا میڈیکل کالج،بلوچستان بورڈ و دیگر ،یہ سب بلوچ قوم پرستانہ سیاست ،جدوجہد اور لازوال قربانیوں کی بدولت قائم ہوئی ہیں۔یہ سیاست اور سماجی تبدیلی کے عمل میں شریک ان لوگوں کے کارنامے ہیں جو اس پسماندہ سماج کے ہیروز ہیں۔ان کی طرز فکر،نظریہ اور سیاست سے کسی کو بھی اختلاف ہوسکتا ہے،انسانی تاریخ یہی کہتی ہے کہ سماجی سائنس اور تبدیلی کے عمل کو روکنا ممکن نہیں۔لہذا اس الجھن میں پڑنے کی بجائے یونیورسٹی کے اندرونی معاملات پر توجہ دینا چاہئے تاکہ آئندہ کسی اور منظور بلوچ کے ساتھ اس طرح کا کوئی اور ناخوشگوار واقعہ پیش نہ آئے جس سے ہماری آنکھیں شرم سے جھک جائیں۔پے درپے واقعات (ایڈمیشن ڈیسک،بک فیئر)کے بعد ڈاکٹر منظور بلوچ کے ساتھ جو کچھ ہوا اس نے تو سب کو ہلا کر رکھ دیا۔بولنے کیلئے الفاظ ہیں اور نہ زبان۔۔۔ہم نہ صرف ڈاکٹر منظور بلوچ کے سامنے شرمندہ ہیں بلکہ اپنی بلوچی اور اکیڈمک تاریخ کے سامنے بھی اس کے جوابدہ ہیں۔شاید ڈاکٹر منظور بلوچ ہماری اس غفلت کو درگزر کردے لیکن کیا تاریخ ہماری درخواست کو قبولیت بخشے گی اور ہمیں معاف کرے گی۔؟

 

*ڈاکٹرطاہرحکیم بلوچ ،یونیورسٹی آف تُربَت میں ایسوسی ایٹ پروفیسر ہیں۔